آج کے بعد انشاء اللہ اسرائیل دوبارہ اٹھ نہیں سکے گا، سراج الحق

کراچی : امیر جماعت اسلامی سراج الحق نے کہا ہے کہ اسرائیل میں ہونے والی حماس کی کارروائی کے بعد انشاءاللہ اسرائیل دوبارہ کھڑا نہیں ہوگا۔

بجلی کی قیمتوں میں اضافے کے خلاف گورنرہاؤس کراچی پر دھرنے کے شرکاء سے خطاب کرتے ہوئے انہوں نے کہا کہ فلسطینی عوام حق پر ہے، جماعت اسلامی فلسطینی عوام کی بھرپور حمایت کرتی ہے، آج صلاح الدین ایوبی خوش ہوں گے، آج کے بعد انشاءاللہ اسرائیل دوبارہ کھڑا نہیں ہوگا۔

سراج الحق کا کہنا تھا کہ یہودیوں نے گریٹر اسرائیل کا نقشہ جاری کیا تھا لیکن حماس کے مجاہدین کی اسرائیل میں کی گئی کامیاب کارروائی سے یہودیوں کے خواب چکنا چور ہوگئے۔

انہوں نے کہا کہ حملے میں 700 سے زائد یہودی جہنم واصل ہوئے، عالم اسلام 58 ممالک پر مشتمل ہے، 74 لاکھ سے زائد افواج اور 9 سمندروں پر حکمرانی ہے، میں سمجھ رہا تھا کہ سب مل کر حمایت کا اعلان کریں گے۔

انہوں نے کہا کہ اسرائیل کو آباد کرنے کیلئے کئی یہودی روس، فرانس، امریکا سے بھی آئے تھے، ،مختلف ممالک سے یہودیوں کو جمع کرکے اسرائیل بنایا گیا، قائداعظم نے جب ہی کہہ دیا تھا کہ اسرائیل ایک ناجائز ریاست ہے، پاکستان کبھی بھی اس ناجائز ریاست کو قبول نہیں کرے گا۔

سراج الحق نے کہا کہ جماعت اسلامی نے کہا تھا کہ ہم تین دن کا دھرنا دیں گے لیکن غزہ میں ہمارے بھائی زخمی ہیں، شہید ہورہے ہیں، جنگ کا ماحول ہے، ہم اپنے ملک میں کھڑے ہوکر فلسطین کا ساتھ دینے کا اعلان کرتے ہیں۔

امیر جماعت اسلامی کا کہنا تھا کہ مہنگائی کے خلاف جماعت اسلامی کی تحریک جاری رہے گی، تاہم یہ لمحات کچھ واجب اور سنت ادا کرنے کے ہیں، اس لیے اس وقت کو ہم فلسطینی عوام کے نام کرتے ہیں، حکومت سے کہتا ہوں کہ ہم آپ کی خاموشی کو یہودی اور امریکا کی حمایت سمجھتے ہیں لہٰذا آپ کھل کر فلسطین کی حمایت کا اعلان کریں۔

from ARYNews.tv | Urdu – Har Lamha Bakhabar https://ift.tt/301dUSi