مہنگائی کی شرح‌ میں نمایاں اضافہ

اسلام آباد : مسلسل دو ہفتے کمی کے بعد ایک بار پھر مہنگائی نے زور پکڑلیا تاہم گھی اور آئل کی قیمت میں کمی ریکاڈ کی گئی ہے۔

تفصیلات کے مطابق وفاقی ادارہ شماریات کی ہفتہ وار رپورٹ میں بتایا گیا ہے کہ گزشتہ ایک ہفتے کے دوران 12 اشیائے ضروریہ کی قیمتوں میں اضافہ ہوا ہے جبکہ سالانہ بنیادوں پر مہنگائی کی شرح 29 اعشاریہ 88 فیصد کی سطح پر آگئی ہے۔

رپورٹ کے مطابق دو ہفتے کمی کے بعد تیسرے ہفتے پھرسے مہنگائی کا پارہ چڑھ گیا ہے۔ ہفتہ وار بنیادوں پر مہنگائی کی شرح میں0.71 فیصد کا اضافہ ہوا، اور سالانہ بنیادوں پر مہنگائی کی شرح 29.88فیصد کی سطح پر پہنچ گئی ہے۔

اعداد و شمار کے مطابق ایک ہفتے میں ٹماٹر 34 روپے اضافے سے 165روپے فی کلو ہوگئے اور پیاز 25 روپے اضافے سے 123روپے فی کلو میں فروخت ہورہی ہے۔

زندہ مرغی کی اوسطاً قیمت37 روپے اضافے سے 349 روپے فی کلو تک پہنچ گئی جب کہ چائے کی پتی، چینی، چاول، دودھ، لہسن، آلو، انڈے بھی رواں ہفتے مہنگے ہوگئے۔

رپورٹ میں بتایا گیا ہے کہ ایک ہفتے کے دوران 14اشیا سستی بھی ہوئیں، اس دوران ایل پی جی گھریلو سیلنڈر 33 روپے کمی سے 3125 روپے کا ہو گیا، ایک ہفتے میں گھی7 روپے کمی سے 522 روپے فی کلو ہوگیا۔

ادارہ شماریات کے اعداد و شمار کے مطابق ایک ہفتے کے دوران دال مونگ، دال مسور، دال چنا، ماش، کیلا، گڑ اور آٹے کی قیمتوں میں معمولی کمی ہوئی جب کہ ایک ہفتے کے دوران 25 اشیائے ضروریہ کی قیمتوں میں استحکام رہا۔

from ARYNews.tv | Urdu – Har Lamha Bakhabar https://ift.tt/Ph27niD