لاہور : محکمہ صحت پنجاب کی جانب سے طلبہ کے لیے انٹرن شپ پروگرام کے تحت صحت کے شعبے میں کیریئر بنانے کا سنہری موقع فراہم کیا جارہا ہے۔
تفصیلات کے مطابق محکمہ صحت و آبادی پنجاب نے طلبہ اور گریجویٹس کے لیے انٹرن شپ پروگرام کا اعلان کر دیا ہے، جس کے تحت فارمیسی اور متعلقہ شعبوں سے وابستہ نوجوانوں کو عملی تجربہ فراہم کیا جائے گا۔
اعلامیے کے مطابق یہ انٹرن شپ پروگرام خاص طور پر پنجاب کی سرکاری جامعات کے فارماڈی طلبہ، گریجویٹس اور پوسٹ گریجویٹس کے لیے ہے۔
اس پروگرام میں فائنل ایئر کے وہ طلبہ بھی درخواست دے سکتے ہیں جن کے نتائج ابھی متوقع ہوں، اس کے علاوہ فارماڈی مکمل کرنے کے دو سال کے اندر اور ماسٹرز یا ایم فل کے دو سال کے اندر فارغ التحصیل طلبہ بھی اہل ہوں گے۔
محکمہ صحت کے مطابق درخواست دینے کا طریقہ کار مکمل طور پر آن لائن رکھا گیا ہے، جس میں امیدواروں کو رجسٹریشن کے بعد اپنا پروفائل مکمل کرنا ہوگا اور مطلوبہ دستاویزات اپ لوڈ کرنا ہوں گی۔
حکام کے مطابق درخواست جمع کرانے کی آخری تاریخ 12 مئی 2026 مقرر کی گئی ہے اور درخواستیں رات 12 بجے تک جمع کرائی جا سکیں گی، صرف آن لائن درخواستوں کو ہی قبول کیا جائے گا۔
یہ پروگرام ڈائریکٹوریٹ آف ڈرگز کنٹرول پنجاب کے تحت چلایا جا رہا ہے، جس کا مقصد نوجوانوں کو پیشہ ورانہ تربیت دے کر صحت کے شعبے کو مزید مضبوط بنانا ہے۔
from ARYNews.tv | Urdu – Har Lamha Bakhabar https://ift.tt/DF68Q0J
No comments:
Post a Comment