پاکستان میں اس وقت 11 کروڑ لوگ غربت کی لکیرسےنیچے ہیں، محمد زبیر

مسلم لیگ ن کے رہنما اور سابق گورنر سندھ محمد زبیر نے کہا ہے کہ پاکستان میں اس وقت غربت کی لکیرسےنیچے لوگوں کی تعداد 11 کروڑہے۔

تفصیلات کے مطابق مسلم لیگ ن کے رہنما کا اے آر وائی کے پروگرام میں گفتگو کرتے ہوئے کہنا تھا کہ پاکستان میں بےروزگار افراد کی تعداد 2 کروڑ سے تجاوز کرگئی ہے۔ آئی ایم ایف پروگرام سے ایلیٹ کو کوئی فرق نہیں پڑتا، بوجھ عوام برداشت کرتی ہے۔

محمد زبیر نے کہا کہ نئی حکومت آتی ہے تو ماحول ایسا بنایا جاتا ہے کہ آئی ایم ایف معاہدہ ہوگیا تو مسائل حل ہوجائیں گے۔ کسی سے بھی پوچھ لیں کہ پاکستان کی معاشی حالت بہت خراب ہے۔

انھوں نے کہا کہ ہم نے ورلڈ ریکارڈ رکھا ہے 24 ویں مرتبہ آئی ایم ایف پروگرام میں جائیں گے۔ بوجھ عوام برداشت کرتی ہے اور کریڈٹ ایلیٹ کلاس لیتی ہے کہ پروگرام ہوگیا۔ عوام کو ایک ہی بات کہی جاتی ہے کہ دو سال مشکلات ہونگی پھر بہتری آجائے گی۔

رہنما مسلم لیگ نے کہا کہ غیرمعمولی بات ہے کہ ن لیگ کی حکومت ہے اور اسحاق ڈار وزیرخزانہ نہیں۔ پہلی مرتبہ ہے کہ ن لیگ اپنی پارٹی کو چھوڑ کر باہر سے وزیرخزانہ لے کرآئی۔

انھوں نے کہا کہ محمد اورنگزیب کی قابلیت پر بات نہیں کررہا لیکن ایسے اقدامات کیخلاف ہوں، محمد اورنگزیب عوام کو جوابدہ نہیں ہونگے ن لیگ کو جوابدہ ٹھہرایا جائےگا۔ پوری دنیا میں کہیں نہیں ہوتا کہ وزیرخزانہ پارٹی سے باہر سے لاکر لگا دیا جائے۔

محمدزبیر نے کہا کہ ن لیگ کی فیصلہ سازی یا موجودہ سیٹ اپ کا حصہ نہیں ہوں، ن لیگ کو آفیشل طور پر چھوڑا نہیں ہے لیکن ویسے متحرک نہیں، اس وقت نئی جماعت کی ضرورت ہے کیونکہ 3 بڑی جماعتیں متنازع ہوچکی ہیں، تینوں جماعتوں کے ماضی میں کچھ اور آج کل کچھ بیانیے ہیں۔

انھوں نے کہا کہ ووٹ کو عزت دو کا بیانیہ چھوڑ دیا جائے اس پارٹی کے رکن کیلئے مشکل ہوتا ہے، وزیراعظم نے جو دو تین فیصلے کیے اس سے کنفیوژن زیادہ پھیلی ہے۔

محمد زبیر نے کہا کہ وزارت خارجہ اہم ہے لیکن پاکستان میں اس پر زیادہ توجہ نہیں دی جاتی۔ وزارت خارجہ کے ذریعے پاکستان میں بڑی سرمایہ کاری لائی جاسکتی ہے۔ وزیرخارجہ کو ایسی کمیٹیوں میں ڈال دیا گیا ہے جہاں ان کا کام نہیں ہے۔

انھوں نے کہا کہ وزیرخزانہ کو کچھ کمیٹیوں میں شامل کیا گیا ہے تو وہاں بھی وزیرخارجہ کے ماتحت ہونگے۔ سی سی آئی میں وزیرخارجہ کو رکھا گیا ہے یہ بھی پہلی مرتبہ ہورہا ہے۔

محمد زبیر نے کہا کہ ن لیگ کی جانب سے پیغام واضح ہے کہ اسحاق ڈار کہیں نہیں جارہے۔ ن لیگ نے واضح پیغام دیا ہے کہ معیشت کے فیصلوں میں اسحاق ڈار شامل ہونگے۔

رہنما مسلم لیگ نے کہا کہ ہوسکتا ہے کہ اسحاق ڈار کو دوبارہ وزیرخزانہ بنادیا جائے۔ آئی ایم ایف کی جانب سے دیا گیا بجٹ ہوگا جس میں سخت فیصلے کرنا ہونگے۔ بجٹ میں سوالات اٹھیں گے تو کسی نہ کسی کو بکرا بنایا جائے گا۔

from ARYNews.tv | Urdu – Har Lamha Bakhabar https://ift.tt/FIoLnT3